我愛食好西~I Love Eating "West"

2018年7月26日星期四

達人包車@尖沙咀

韓食之選
達人包車@尖沙咀

慶祝朋友生日，一行8人
我負責訂位，剛巧遇上韓國人，要講英文..去到餐廳，原來都有幾個香港人侍應..座位寬敞。打開menu，樣樣想食

大大串串燒 $32x
一黎就掛起去，一大串，已經半熟，有侍應專人服侍，肉味道唔錯，但8個人有點少，每人分了兩舊肉，仲有腸，得一隻蝦，仲有什椒。價錢覺得貴一點

部隊鍋 $250
好好味，有年糕，金菇，豆腐，個麵細個左一點點，都幾辣！好正！仲要自己加了兩個麵，哈哈，散叫的麵大個好多！

芝士排骨 $280/5pcs
我都要了6pcs，差不多$300，比較貴，一條條排骨，一人一條，有少少年糕金菇，旁邊有芝士，飯團同腸仔，樣樣少少！依個排骨無咩味道，而且真係太貴！唔值。+$30 炒飯！侍應會倒飯落去，有紫菜碎芝麻碎，加埋汁一齊炒，依個仲好食..還撈了芝士，好邪惡

醬香炸雞 $170
全晚最好味的，雞好嫩，醬香=豉油，味道咸咸有少許甜，每舊雞不會太大舊，very good!但配的薯條，麻麻地好味！

傳統飯卷 $5x
依個正常味道，欠了麻油香味，夠飽肚！

石榴雞尾酒（無酒精$78，有酒精$118）
依個貪得意，吊血包，哈哈，一人份量，勉強可以兩個人飲..自己加冰，味道甜甜，無咩石榴味。

西瓜燒酒 $180
好特別，半個西瓜上枱，味道甜，無酒味..應該唔易醉！附上小杯，大概都有十幾二十杯

整體味道不過不失，係幾特別的韓國餐！大概每人$250-300，中上價錢，服務ok，環境幾靚！無限時！

地址：尖沙咀金巴利道79-81號

茶聊@旺角

幾耐沒有寫blog
日本之旅爛尾，掛住玩掛住食...
到最後都係無心寫落去！因為旅行既食物，真係要自己好好去感受下試下

今期同朋友去左一間新開cafe
《茶聊》

因為無得訂位，7:00前已經去到！
響旺角砵蘭街，一楝商業大廈！樓下有個靚女問我地去邊層，因為二樓係叫長阪燒，同茶聊同一集團

上到去有人帶位，已經好爆，我地唔想坐Bar位，唯有坐長枱，同其他6人一齊坐
如果坐二人枱應該會好正

我地睇完menu要自己買野食,買完有人送餐來！Menu唔算多野食，但全部簡直係好吸引，有好多款飲品，有意粉有包，又有甜品梳乎厘

我地揀左幾款

卡邦尼蛋黃意粉 $58
一上枱感覺比較細碟，但好好味！熱辣辣！因為比較流，兩個女仔食剛好。足料，味道剛好，不偏咸。

鰻魚芝士玉子漢堡包 $88
好想揀龍蝦包或者軟殻蟹包，但朋友唔食！唯有試鰻魚，但係會唔會唔夾呀？！但點知一枱好吸晴，鰻魚好肥好大份！一早切開兩邊，好細心！食既時候微熱，鰻魚無骨唔腥..原來同包都好夾，一啖啖鰻魚芝士蛋，不過蛋就少左d，要改善下
碟上有薯條，不錯，軟硬適中，不太燶。
還有一兜小沙律，千島醬配少許菜同紅蘿白。旁邊仲有個蕃茄紅兔仔，好靚，但無影俾朋友一啖食左

炸水牛雞小腿 $68
好香口，唔會乾身，juicy。有6-7舊

四季春芝士奶蓋、東方美人芝士奶蓋 $36一杯

我地養生飲熱，都好大杯，四季春比較淡口，烏龍茶溝左少少綠茶，東方美人就係紅茶！
一上枱根本飲唔到，因為太熱，芝士奶蓋面係凍，因為都好厚既一層，要大大啖好似飲啤酒甘，一大啖倒入口，凍芝士同熱茶溝埋飲，好正..俾十個like
講真飲到尾堅飽，層芝士仲有少量響杯入面...但周邊個個飲凍飲，好好大杯呀，水果茶好吸引下次要飲！

飲飽食醉拍拍pat pat就走！

總結：一間食物美味，坐得舒服既cafe!最緊要係無限時，但係就要早點去搵位，新開比較多人！而且感覺唔嘈，可能地方比較大！午餐下午茶晚餐都有啱胃口既野食！最緊要可以茶聊

茶聊
地址：旺角砵蘭街189號1樓